(ଦ କୁଇଭର): ରେଳ ଅନୁଦାନରେ ଇତିହାସ ରଚିଲା ଓଡ଼ିଶା । ପ୍ରଥମ ଥର ପାଇଁ ପୂର୍ବ ଅପେକ୍ଷା ୧୦ ଗୁଣ ଓଡ଼ିଶାକୁ ଅନୁଦାନ ମିଳିଛି । ରେଳ ବଜେଟରେ ଓଡ଼ିଶାକୁ ରେକର୍ଡ ଅନୁଦାନ ମିଳିବା ପରେ କେନ୍ଦ୍ର ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ପ୍ରତିକ୍ରିୟା ରଖି କହିଛନ୍ତି, ଓଡ଼ିଶାକୁ ଏହି ଅନୁଦାନ ଇତିହାସରେ ସର୍ବାଧିକ । ୟୁପିଏ ସରକାର ତୁଳନାରେ ଓଡ଼ିଶାକୁ ୧୦ଗୁଣ ଅଧିକ ଅନୁଦାନ ମିଳିଛି । ଓଡ଼ିଶାକୁ ୯୭୨୩ କୋଟି ଟଙ୍କାର ଅନୁଦାନ ରେଳବିକାଶ ପାଇଁ ନରେନ୍ଦ୍ର ମୋଦୀ ଦେଇଛନ୍ତି । ଏଣିକି ପ୍ରକଳ୍ପ ପାଇଁ ଆଉ ରହିବିନି ପାଣ୍ଠିର ଅଭାବ । ଅଧିକ ଜମି ମିଳିଲେ ପ୍ରକଳ୍ପ କାମ ଆଗେଇ ଚାଲିବ । ଜମି ଯୋଗାଇ ଦେବା ରାଜ୍ୟ ସରକାରଙ୍କ ଦାୟିତ୍ୱ ବୋଲି କହିଛନ୍ତି ଅଶ୍ୱିନୀ ବୈଷ୍ଣବ ।
୨୦୧୪ରୁ ୧୯ ମଧ୍ୟରେ ପୂର୍ବ ସରକାର ଓଡ଼ିଶାକୁ ଯେଉଁ ରେଳବଜେଟ ଦେଉଥିଲେ ତାହାର ୪ ଗୁଣା ଅଧିକ ବଜେଟ ଦେଲେ ମୋଦୀ ସରକାର। ପ୍ରତ୍ୟେକ ବର୍ଷ ହାରାହାରି ୪୧୨୬ କୋଟି ଟଙ୍କାର ବଜେଟ ଏହି ସମୟରେ ଓଡ଼ିଶାକୁ ମିଳିଥିଲା । ୨୦୧୯-୨୦ରେ ୪୫୬୮, ୨୦-୨୧ରେ ୫୨୯୬ କୋଟି, ୨୦୨୧-୨୨ରେ ୫୯୨୧ କୋଟି, କାମର ଗତି ଦେଖିବା ପରେ ଅତିରିକ୍ତ ୫୫୦ କୋଟି ପ୍ରଦାନ କରିଥିଲେ । ଏଥର ରେଳ ପାଇଁ ଓଡ଼ିଶାକୁ ରେକର୍ଡ ଅନୁଦାନ ଦେଇଛନ୍ତି ।
ନୂଆ ନୂଆ ପ୍ରକଳ୍ପ ପାଇଁ ମୋଦୀ ସରକାରଙ୍କ ପ୍ରବଳ ମାତ୍ରାରେ ଇଚ୍ଛାଶକ୍ତି ରହିଛି । ପ୍ରକଳ୍ପ ପାଇଁ ଜମି ଅଧିଗ୍ରହଣ ସବୁଠୁ ବଡ ଚ୍ୟାଲେଞ୍ଜ, ଏହାସତ୍ତେ୍ୱ ମଧ୍ୟ ବିଭିନ୍ନ ପ୍ରକଳ୍ପ ଆଗେଇ ଚାଲିଛି । ଉଭୟ ସରକାର ମିଶି କାମ କଲେ ଆହୁରି ଶୀଘ୍ର କାମ ହେବ ଏବଂ ନୂଆ ନୂଆ ପ୍ରକଳ୍ପ ମଧ୍ୟ ଆରମ୍ଭ ହେବ । ଅନୁଦାନ ଯୋଗାଇବା କେନ୍ଦ୍ର ସରକାରଙ୍କ ଦାୟିତ୍ୱ । ପ୍ରକଳ୍ପ ପାଇଁ ଆବଶ୍ୟକ ପାଣ୍ଠିର ଆଉ ଅଭାବ ରହିବନି । ପ୍ରକଳ୍ପ ପାଇଁ ସ୍ଥାନୀୟ ସମସ୍ୟା ଦୂର କରିବା ରାଜ୍ୟ ସରକାରଙ୍କ ଦାୟିତ୍ୱ ବୋଲି କହିଛନ୍ତି ରେଳମନ୍ତ୍ରୀ ।
ରାଜ୍ୟ ସରକାର ସମ୍ପୂର୍ଣ୍ଣ ଜମି ଅଧିଗ୍ରହଣ କରିବା ପରେ ଏହି ପ୍ରକଳ୍ପ ଆଗକୁ ବଢିବ । ଏହାଛଡା ଯାତ୍ରୀ ଯେମିତି ଯାତ୍ରା ସମୟରେ ବିରକ୍ତ ହେବେନି ଓ ସୁବିଧାଜନକ ଯାତ୍ରା ପାଇପାରିବେ ସେଥିପାଇଁ ବନ୍ଦେ ଭାରତ ଯୋଜନାର ପରିକଳ୍ପନା । ଓଡ଼ିଶାରେ ମଧ୍ୟ ଖୁବଶୀଘ୍ର ବନ୍ଦେ ଭାରତ ଟ୍ରେନ ଚାଲିବ ବୋଲି ଅଶ୍ୱିନୀ ବୈଷ୍ଣବ କହିଛନ୍ତି।
