(ଦ କୁଇଭର): ପ୍ରାୟତଃ ସାଧାରଣ ଲୋକମାନେ ଜାଣିବାକୁ ଚାହାଁନ୍ତି ଯେ କେଉଁ ରାଜ୍ୟରେ ମୁଖ୍ୟମନ୍ତ୍ରୀ କେଉଁ ସ୍ମାର୍ଟଫୋନ୍ ବ୍ୟବହାର କରନ୍ତି। ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏକ ଆଇଫୋନ୍ ବ୍ୟବହାର କରୁଥିବା ଦେଖିବାକୁ ମିଳିଛି । ୨୦୧୮ ମସିହାରେ ବିଦେଶ ଗସ୍ତ ସମୟରେ ତାଙ୍କୁ ଆଇଫୋନ୍ ୬ ସିରିଜ୍ ସହିତ ଦେଖିବାକୁ ମିଳିଥିଲା । ବର୍ତ୍ତମାନ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ବିଷୟରେ ମଧ୍ୟ ଏହା ସ୍ପଷ୍ଟ ହୋଇଛି ଯେ, ସେ କେଉଁ କମ୍ପାନୀର ଫୋନ୍ ବ୍ୟବହାର କରୁଛନ୍ତି? ଫୋନର ମୂଲ୍ୟ ମଧ୍ୟ ପ୍ରକାଶ ପାଇଛି। ବାସ୍ତବରେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ବିଧାନସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଯାଉଛନ୍ତି। ଏଥିପାଇଁ ସେ ଗୋରଖପୁର ସହରରୁ ଶୁକ୍ରବାର ଦିନ ନାମାଙ୍କନପତ୍ର ଦାଖଲ କରିଥିଲେ। ନାମାଙ୍କନପତ୍ର ଦାଖଲ ସମୟରେ ସେ ତାଙ୍କ ସମ୍ପତ୍ତିର ବିବରଣୀ ମଧ୍ୟ ଦେଇଛନ୍ତି। ଏଥିରେ ସେ ନିଜ ସ୍ମାର୍ଟଫୋନ୍ ବିଷୟରେ ମଧ୍ୟ ଉଲ୍ଲେଖ କରିଛନ୍ତି।
ନିର୍ବାଚନ ଆଫିଡେଭିଟ୍ରେ ସେ କହିଛନ୍ତି ଯେ ତାଙ୍କ ପାଖରେ ୧୨,୦୦୦ ଟଙ୍କା ମୂଲ୍ୟର ଏକ ଫୋନ୍ ଅଛି। ଫୋନର କମ୍ପାନୀ ସାମସଙ୍ଗ ବୋଲି କୁହାଯାଉଛି। ତେବେ ଏହି ଫୋନର ମଡେଲ ନମ୍ବର ବିଷୟରେ କୌଣସି ଉଲ୍ଲେଖ କରାଯାଇ ନାହିଁ। କିନ୍ତୁ ଏହି ମୂଲ୍ୟରେ ଏହା ସାମସଙ୍ଗର ଏଣ୍ଟ୍ରି ଲେଭଲ୍ ସ୍ମାର୍ଟଫୋନ୍ ହୋଇପାରେ ବୋଲି କୁହାଯାଉଛି ।
ସେହିପରି ମୋଦୀଙ୍କର ଏକ ଆଇଫୋନ୍ ଅଛି । କିନ୍ତୁ, ପ୍ରଧାନମନ୍ତ୍ରୀ ଭାବରେ ସେ ସେହି ଫୋନ୍ ବ୍ୟବହାର କରିପାରିବେ ନାହିଁ । ଅଧିକାଂଶ ସମୟରେ, ସେ କେବଳ ଆଇଫୋନରୁ ସେଲଫି ନେଉଥିବାର ନଜର ଆସିଛନ୍ତି । ଖବର ଅନୁଯାୟୀ, ସେ ଭିଭିଆଇପି ଲୋକଙ୍କ ପାଇଁ ନିର୍ମିତ ଏକ ସ୍ୱତନ୍ତ୍ର ସ୍ୟାଟେଲାଇଟ କିମ୍ବା ଆରଏଏକ୍ସ ଫୋନ୍ ବ୍ୟବହାର କରନ୍ତି । ଅନ୍ୟପଟେ ଗଣମାଧ୍ୟମ ରିପୋର୍ଟ ଅନୁଯାୟୀ, ୨୦୧୯ ମସିହାରେ ଗୃହମନ୍ତ୍ରୀ ଅମିତ ଶାହା ଆପୋଲର ଆଇଫୋନ୍ ଏକ୍ସଏସ୍ ମଡେଲ୍ ବ୍ୟବହାର କରୁଥିବା ଦେଖିବାକୁ ମିଳିଥିଲା, ଯାହାକୁ ସେ ନିଜ ଦଳ ସହ ଯୋଡିହେବା ପାଇଁ ବ୍ୟବହାର କରନ୍ତି।
