(ଦ କୁଇଭର): ବର୍ତ୍ତମାନ ଦେଶରେ ଖାଲି ପଡିଛି ଆଇଏଏସ୍ର ପଦବୀ । ଦେଶରେ ବର୍ତ୍ତମାନ ୧୫୧୫ ଜଣ ଆଇଏଏସ୍ ଅଫିସରଙ୍କ ଅଭାବ ରହିଛି ବୋଲି କେନ୍ଦ୍ରମନ୍ତ୍ରୀ ଜିତେନ୍ଦ୍ର ସିଂହ ବୁଧବାର ସଂସଦକୁ ଅବଗତ କରାଇଛନ୍ତି । ଜମ୍ମୁ-କଶ୍ମୀରରେ ୧୩୭ଟି ଆଇଏଏସ୍ ପଦ ଥିବାବେଳେ କେବଳ ୫୯ ଜଣ କାର୍ୟ୍ୟ କରୁଛନ୍ତି। ନିର୍ଦ୍ଧାରିତ ପଦ ଅନୁଯାୟୀ ତାମିଲନାଡୁରେ ସର୍ବାଧିକ (୮୪%) ସଂଖ୍ୟକ ଆଇଏଏସ୍ କାର୍ୟ୍ୟ କରୁଥିବାବେଳେ ଏହାପଛକୁ ଉତ୍ତରପ୍ରଦେଶ, ହରିୟାଣା ଓ ମଧ୍ୟପ୍ରଦେଶ ରହିଛି ।
ୟୁପିଏସ୍ସି ଜରିଆରେ ପ୍ରତିବର୍ଷ ହେଉଥିବା ନିଯୁକ୍ତି ପ୍ରକ୍ରିୟାରେ ମଧ୍ୟ ନବାଗତ ଆଇଏଏସ୍ ଅଫିସରଙ୍କ ସଂଖ୍ୟା ୧୮୦କୁ ବୃଦ୍ଧି କରାଯାଇଛି ବୋଲି ଶ୍ରୀ ସିଂହ ସୂଚନା ଦେଇଛନ୍ତି । ସେହିପରି ଆଇପିଏସ୍ ଅଫିସରଙ୍କ ବାର୍ଷିକ ନିଯୁକ୍ତି ୧୫୦ରୁ ୨୦୦କୁ ବୃଦ୍ଧି କରାଯାଇଛି । ଦେଶର ସବୁ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ମୋଟ ୬୭୪୬ଟି ଆଇଏଏସ୍ ପଦବୀ ଥିବାବେଳେ ବର୍ତ୍ତମାନ ୫୨୩୧ ଜଣ କାର୍ୟ୍ୟରତ ଅଛନ୍ତି ।
ଜିତେନ୍ଦ୍ର ସିଂ ବୁଧବାର ଲୋକସଭାକୁ କହିଛନ୍ତି ଯେ ସିଭିଲ ସର୍ଭିସେସ୍ ପରୀକ୍ଷା (CSE) ମାଧ୍ୟମରେ ପ୍ରତ୍ୟକ୍ଷ ନିଯୁକ୍ତି ପ୍ରତିବର୍ଷ ଚୟନ କରାଯାଏ । ନିଯୁକ୍ତି ସଂଖ୍ୟା ଏକ କମିଟି ଦ୍ୱାରା ସ୍ଥିର ହୋଇଛି, ୨୦୧୨ ଠାରୁ ବର୍ତ୍ତମାନ ପର୍ୟ୍ୟନ୍ତ ୧୮୦ IAS ଅଧିକାରୀଙ୍କୁ ପ୍ରତିବର୍ଷ CSE ମାଧ୍ୟମରେ ନିଯୁକ୍ତି ଦିଆଯାଇଛି । CSE-୨୦୨୨ ରୁ ୨୦୩୦ ପର୍ୟ୍ୟନ୍ତ ପ୍ରତିବର୍ଷ IAS ଅଧିକାରୀଙ୍କ ନିଯୁକ୍ତି ସ୍ଥିର କରିବାକୁ ଏକ କମିଟି ଗଠନ କରାଯାଇଛି ।
