ନୂଆଦିଲ୍ଲୀ (ଦ କୁଇଭର): ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନ ଅଭିଯୋଗ କରିଛନ୍ତି ଯେ ପାକିସ୍ତାନ ତଥା ବିଦେଶର କିଛି ଲୋକ ତାଙ୍କୁ ହତ୍ୟା କରିବା ପାଇଁ ଷଡଯନ୍ତ୍ର କରୁଛନ୍ତି। ଶନିବାର ଏକ ସାଧାରଣ ସଭାରେ ଭାଷଣ ଦେଇ ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନ ଦାବି କରିଛନ୍ତି ଯେ ତାଙ୍କୁ ହତ୍ୟା କରିବା ପାଇଁ ଷଡଯନ୍ତ୍ର ପାକିସ୍ତାନ ତଥା ବିଦେଶରେ ଚାଲିଛି ।
ପଞ୍ଜାବ ପ୍ରଦେଶର ସିଆଲକୋଟରେ ଏକ ବଡ ରାଲିରେ ଯୋଗ ଦେଇ ଖାନ କହିଛନ୍ତି ଯେ ଏହି ଷଡଯନ୍ତ୍ର ବିଷୟରେ ସେ କିଛି ଦିନ ପୂର୍ବରୁ ଜାଣିଥିଲେ। ତାଙ୍କୁ ହତ୍ୟା କରିବାର ଷଡଯନ୍ତ୍ର ସମ୍ପର୍କରେ ସେ ଏକ ଭିଡିଓ ରେକର୍ଡ କରି ଏକ ସୁରକ୍ଷିତ ସ୍ଥାନରେ ରଖିଛନ୍ତି ବୋଲି ପିଟିଆଇ ସଭାପତି କହିଛନ୍ତି । ସେହି ଭିଡିଓରେ ସେ ତାଙ୍କ ସରକାରକୁ ହଟାଇବା ପାଇଁ ‘ଷଡଯନ୍ତ୍ର’ ପଛରେ ଥିବା ପ୍ରତ୍ୟେକ ଚରିତ୍ର ବିଷୟରେ ଉଲ୍ଲେଖ କରିଛନ୍ତି।
ଗତ ମାସରେ କ୍ଷମତାଚ୍ୟୁତ ହେବା ପୂର୍ବରୁ ମଧ୍ୟ ଇମ୍ରାନ ଖାନ୍ କହିଥିଲେ ଯେ ତାଙ୍କ ଜୀବନ ପ୍ରତି ବିପଦ ରହିଛି। ଗତ ମାସରେ ଅନାସ୍ଥା ପ୍ରସ୍ତାବ ଦ୍ୱାରା ଇମ୍ରାନ ଖାନଙ୍କୁ ପ୍ରଧାନମନ୍ତ୍ରୀ ପଦରୁ ବିଦା କରାଯାଇଥିଲା। ଏହା ପଛରେ ଆମେରିକାର ହାତ ଥିବା ସେ ଅଭିଯୋଗ କରିଥିଲେ। ଗାଦିଚ୍ୟୁତ ହେବା ପରେ ଇମ୍ରାନ ପାକିସ୍ତାନର ବିଭିନ୍ନ ସ୍ଥାନରେ ସାଧାରଣ ସଭା କରି ବର୍ତ୍ତମାନର ସରକାର ବିଶ୍ୱାସଘାତକ ଓ ଦୁର୍ନୀତିଗ୍ରସ୍ତ ବୋଲି କହୁଛନ୍ତି।
