(ଦ କୁଇଭର ବ୍ୟୁରୋ): ମିଆଁମାରରେ ପୁଣି ଫେରିଛି ଫାସି ଦଣ୍ଡାଦେଶ । ଶେଷ ଥର ପାଇଁ ଏହି ଦେଶରେ ୧୯୮୮ରେ ମୃତ୍ୟୁଦଣ୍ଡ ଦିଆଯାଇଥିଲା । ଗତ ୩୪ ବର୍ଷ ଧରି କୋର୍ଟ ଫାସି ଦଣ୍ଡାଦେଶକୁ ଏଡାଇ ଦେଇଥିଲେ କିନ୍ତୁ ମିଆଁମାରର ସାମରିକ ସରକାର ଏହାକୁ ପୁଣିଥରେ ପରିବର୍ତ୍ତନ କରିବାକୁ ଯାଉଛନ୍ତି । ମିଆଁମାରର ସାମରିକ ସରକାର ଶୁକ୍ରବାର ଦିନ ବହିଷ୍କୃତ ନେତା ଅଙ୍ଗ ସାନ ସୁ କିଙ୍କ ଦଳର ଜଣେ ପୂର୍ବତନ ସାଂସଦଙ୍କୁ ମୃତ୍ୟୁଦଣ୍ଡାଦେଶ ଘୋଷଣା କରିଛନ୍ତି । ଏହା ବ୍ୟତୀତ ଦେଶର ଆତଙ୍କବାଦ ବିରୋଧୀ ଆଇନ ଉଲ୍ଲଂଘନ କରି ଦୋଷୀ, ସାବ୍ୟସ୍ତ ହୋଇଥିବା ଗଣତନ୍ତ୍ର ସମର୍ଥକଙ୍କୁ ମଧ୍ୟ ଫାଶୀ ଦିଆଯିବ ବୋଲି ସୂଚନାମିଳିଛି ।
ଜାତୀୟଗଣମାଧ୍ୟମରୁ ମିଳିଥିବା ସୂଚନାନୁସାରେ ୪ ଜଣଙ୍କୁ ଫାଶୀ ଦିଆଯିବ ବୋଲି ସାମରିକ ସରାକର କହିଛନ୍ତି । ଅଙ୍ଗ ଦଳର ପୂର୍ବତନ ସାଂସଦ ଫିଓ ଜେୟା ଥା ଏବଂ କାର୍ୟ୍ୟକର୍ତ୍ତା କାୟା ମିନ ୟୋ ଓରଫ ଜିମିକୁ ଫାଶୀ ଦିଆଯିବ। ଏହା ବ୍ୟତୀତ ସେନା ଗୁପ୍ତଚର ସନ୍ଦେହରେ ଜଣେ ମହିଳାଙ୍କୁ ହତ୍ୟା ମାମଲାରେ ଦୋଷୀ ସାବ୍ୟସ୍ତ ହୋଇଥିବା ଅନ୍ୟ ଦୁଇଜଣଙ୍କୁ ମଧ୍ୟ ମୃତ୍ୟୁଦଣ୍ଡ ଦିଆଯିବ। ୧୯୮୮ ମସିହାରେ ମିଆଁମାରରେ ଏହା ପ୍ରଥମ ଥର ହେବ ଯେ ଜଣେ ନ୍ୟାୟିକ ପ୍ରକ୍ରିୟାରେ ଦୋଷୀ ସାବ୍ୟସ୍ତ ହୋଇଥିବା ବ୍ୟକ୍ତିଙ୍କୁ ମୃତ୍ୟୁଦଣ୍ଡ ଦିଆଯିବ ।
ସରକାରୀ ମୁଖପାତ୍ର ମେଜର ଜେନେରାଲ ଜେ ମିନି ଟୁନ୍ କହିଛନ୍ତି ଯେ ଏହି ଚାରିଜଣଙ୍କୁ ଫାଶୀ ଦେବା ନିଷ୍ପତ୍ତି ସେମାନଙ୍କର ଆଇନଗତ ଆବେଦନ ପ୍ରତ୍ୟାଖ୍ୟାନ ହେବା ପରେ ନିଶ୍ଚିତ ହୋଇଛି। ଜେଲ ପ୍ରକ୍ରିୟାରେ ଏହି ଚାରି ଜଣଙ୍କୁ ଫାଶୀ ଦିଆଯିବ ବୋଲି ସେ କହିଛନ୍ତି । ନିୟମ ଅନୁଯାୟୀ, ମୃତ୍ୟୁଦଣ୍ଡ ସରକାରଙ୍କ ମୁଖ୍ୟଙ୍କ ଦ୍ୱାରା ଅନୁମୋଦନ ହେବା ଆବଶ୍ୟକ । ହେଲେ ଦୋଷୀଙ୍କୁ କେବେ ଫାଶୀ ଦିଆଯିବ ତାହା ସେ ସ୍ପଷ୍ଟ କରି ନାହାଁନ୍ତି।