ଫିନଲାଣ୍ଡ (ଦ କୁଇଭର): ଋଷର ୟୁକ୍ରେନ ଆକ୍ରମଣ ପରେ ୟୁରୋପରେ ବଦଳିବାରେ ଲାଗିଛି ରଣନୈତିକ ସମୀକରଣ । ଫିନଲ୍ୟାଣ୍ଡ ଧାରାରେ ସାମିଲ ହୋଇଛି ଆଉ ଏକ ୟୁରୋପୀୟ ଦେଶ ସ୍ବିଡେନ । ଆଜି ସ୍ବିଡେନ ପ୍ରଧାନମନ୍ତ୍ରୀ ନାଟୋ ସଦସ୍ୟତା ଚାହୁଁଥିବା ଘୋଷଣା କରିଛନ୍ତି । ଗତକାଲି ଫିନଲ୍ୟାଣ୍ଡ ନାଟୋରେ ସାମିଲ ହେବା ପାଇଁ ଇଚ୍ଛା ପ୍ରକାଶ କରିସାରିଛି ।
ସ୍ବିଡେନ ପ୍ରଧାନମନ୍ତ୍ରୀ ମଗଦାଲେନା ଆଣ୍ଡରସେନଙ୍କ ଏପରି ଖୋଲା ଘୋଷଣା ପରେ ଋଷର ଚିନ୍ତା ମଧ୍ୟ ବଢିଛି । ଆମେରିକା ବିରୋଧରେ ବଳ କଷୁଥିବା ଋଷର ଚିନ୍ତା ବଢାଇବାରେ ଲାଗିଛନ୍ତି ବିଭିନ୍ନ ୟୁରୋପୀୟ ଦେଶ । ଋଷ ମଧ୍ୟ ଏହି ଘଟଣା ସାମ୍ନାକୁ ଆସିବା ପରେ ତୀବ୍ର ପ୍ରତିକ୍ରିୟାଶୀଳ ହୋଇଛି । ଫିନଲ୍ୟାଣ୍ଡ ଓ ସ୍ବିଡେନର ନାଟୋରେ ମିଶିବା ନିଷ୍ପତ୍ତି ଏକ ଗମ୍ଭୀର ଭୁଲ ନିଷ୍ପତ୍ତି ବୋଲି ମସ୍କୋ କହିଛି ।
ସ୍ବିଡେନରେ ମଧ୍ୟ ନାଟୋରେ ସାମିଲ ହେବା ପ୍ରସ୍ତାବରେ ରାଜନୈତିକ ସହମତି ପ୍ରକାଶ ପାଇଥିବା ସୂଚନା ମିଳିଛି । ଆଜି ସ୍ବିଡେନ ସଂସଦରେ ଏକ ବିତର୍କ ସମୟରେ ଏକାଧିକ ରାଜନୈତିକ ଦଳ ନାଟୋରେ ସାମିଲ ହେବା ନିଷ୍ପତ୍ତିକୁ ଯଥାର୍ଥ ବୋଲି ଦର୍ଶାଇଥିଲେ । ମୋଟ 8 ରାଜନୈତିକ ଦଳ ମଧ୍ୟରୁ 6ଦଳ ସହମତି ପ୍ରକାଶ କରିଥିବା ବେଳେ ମାତ୍ର ଦୁଇଟି ଦଳ ଏପରି ନିଷ୍ପତ୍ତିକୁ ବିରୋଧ କରୁଛନ୍ତି ।
ଗତକାଲି ପଡୋଶୀ ଫିନଲ୍ୟାଣ୍ଡ ମଧ୍ୟ ୩୦ ରାଷ୍ଟ୍ର ବିଶିଷ୍ଟ ମିଳିତ ସାମରିକ ମଞ୍ଚ NATO ରେ ସାମିଲ ହେବା ନେଇ ଆଗ୍ରହୀ ଥିବା ଘୋଷଣା କରିଥିଲା । ପୂର୍ବରୁ ଦୁଇ ଦେଶ ନାଟୋରେ ସାମିଲ ହେବା ନେଇ ଚାହିଁଥିଲେ ମଧ୍ୟ ଏହାକୁ ରାଜନୈତିକ ଦଳ ଓ ଦେଶବାସୀଙ୍କ ପକ୍ଷରୁ ବିରୋଧ କରାଯାଇଥିଲା । ତେବେ ୨୪ ଫେବୃଆରୀରେ ଋଷ ୟୁକ୍ରେନରେ ଆକ୍ରମଣ କରିବା ପରେ ୟୁରୋପର ରାଜନୈତିକ ଓ ରଣନୈତିକ ସ୍ଥିତି ବଦଳିଛି । ଏବେ ବର୍ତ୍ତମାନର ସ୍ଥିତିକୁ ଦେଖି ଉଭୟ ରାଷ୍ଟ୍ର ନାଟୋ ମୁହାଁ ହେବାରେ ଲାଗିଛନ୍ତି ।
ତେବେ ଉଭୟ ୟୁରୋପୀୟ ରାଷ୍ଟ୍ରର ଏପରି ଘୋଷଣା ପରେ ପ୍ରତିକ୍ରିୟାଶୀଳ ହୋଇଛି ଋଷ । ମସ୍କୋ ଏହା ଉପରେ ନଜର ରଖିଛି ଓ ସଠିକ ସମୟରେ ଆବଶ୍ୟକୀୟ ପଦକ୍ଷପ ମଧ୍ୟ ନେବ ବୋଲି ଋଷ ପକ୍ଷରୁ କୁହାଯାଇଛି । ଉଭୟ ଦେଶ ଗମ୍ଭୀର ଭୁଲ କରିବାକୁ ଯାଉଛନ୍ତି । ଏପରି ନିଷ୍ପତ୍ତି ପୁଣି ଥରେ ଉତ୍ତେଜନା ସୃଷ୍ଟି କରିବା ପାଇଁ ଦାୟୀ ହେବ ବୋଲି ଋଷର ଉପ ବୈଦେଶିକ ମନ୍ତ୍ରୀ ଚେତାବନୀ ଦେଇଛନ୍ତି ।
